انصار: (د چنګاښ ۱۹ مه)، د طالبانو حکومت د کابينې غونډه د دوی د رئيس الوزرا ملا محمد حسن آخند په مشرۍ پر يو شمېر موضوعاتو بحث او پرېکړې کړې دي.
د چارو ادارې ریاست په خپرپاڼه کې ویل شوي، چې په دې غونډه کې د آقينې- اندخوی اوسپنې پټلۍ د لومړي فاز د ۳۰ کيلومتره ځمکې د استملاک په اړه بحث شوی او يو پلاوی ټاکل شوی، چې د دې ځمکې د استملاک چارې له نږدې وڅېړي او پايله دې د کابينې راتلونکې غونډې ته وړاندې کړي.
همدا رنګه، په یاده غونډه کې ټولګټو وزارت ته دنده سپارل شوې چې د کابل- کندهار لويې لارې د جوړولو چارې له کابل تر غزني پورې د دویم سړک جوړولو لپاره له شرکتونو سره د قرارداد په اړه ناسته وکړي او پايلې يې د طالبانو رياست الوزرا له مقام سره شريکه کړي؛ ترڅو يې د جوړېدو عملي چارې ژر پيل شي.
طالبان نږدې هره اوونۍ د دوی د رژیم د کابینې د غونډې خبر ورکوي، خو تصویرونه او ویډیوګانې یې کله هم نه دي رسنیز شوي.
د دې تر څنګ نیوکې دا دي، چې ډېر لږ ځله د طالبانو د کابینې له ادرسه د شویو پریکړو د عملي کېدو خبرې اورېدل شوي.
URL تعقيب: https://www.ansarpress.com/pashto/32417
سور صلیب: د افغانستان د اقتصادي سیستم د سقوط د مخنیوي هڅه کوو